Музей “Успамін” сярэдняй школы №109 Заводскага раёна г. Мiнска працуе пад дэвізам “Знайсці, зберагчы, перадаць” i налічвае болей 250 экспанатаў асноўнага фонду. А пачыналася гiсторыя музея ў 1991г. Настаўніца пачатковых класаў Шайкова Ларыса Максімаўна рыхтавала адкрыты ўрок па тэме “Культура Беларусі”. Прапанавала вучням прынесці прадметы дамашняга ўжытку. Вучні прынеслі рушнікі, вышыўку, гліняны посуд і іншыя прадметы даўніны. Урок спадабаўся дзецям і гасцям. Шкада было разлучацца з дзіўнымі экспанатамі. Вырашылі зрабіць выставу і паказаць усім у школе. Звярнуліся з прапановай к вучням, бацькам і настаўнікам прыносіць рэчы для музея. Вось так і з’явіўся ў нашай школе музей “Успамін”. Да 2020 года кіраўнiком музея працавала Шэхаўцава Лілія Францаўна.

На сённяшні дзень кіраўніком музея працуе Жаўток Людміла Савельеўна.

На базе музея праходзяць урокі беларускай мовы і латаратуры, гісторыі, працоўнага навучання. Цікавыя ўрокі для вучняў пачатковай школы: “Што можна зрабіць з дрэва і гліны”, “Што рабілі рукі бабулі”.

Савет музея арганізоўвае і праводзіць святы: “Гуканне вясны”, “Каляды”, “Масленіца”, “Вялікдзень”.

Сістэматычна праходзяць аглядавыя і тэматычныя экскурсіі, конкурсы малюнкаў для пачатковай школы. Кожны год запрашаем у музей ветэранаў працы. 

Асноўнымі сродкамі камплектавання музея сёння з’яўляюцца экспедыцыі па Смалявіцкаму раёну, вёсках В.Сціклева і В.Трасцянец, а таксама пошуковая праца.

Запрашаем у наш музей, рады бачыць мы гасцей!

Адрас: г. Мiнск, вул.Ангарская, 24 220102

тэл. 317-23-27

sch109@minsk.edu.by

Экспазіцыя музея “Успамін” складаецца з дзвух частак. Першая частка- “Сялянская хата”, гэта месца, дзе ў прамым сэнсе слова можна дакрануцца да старыны. А якая ж сялянская хата без печкі? Побач люльку павесілі, каля печы- ложак. Ёсць “бабін вугал”, у якім знаходзяцца прадметы хатняга ўжытку: збаны, маслабойкі і іншыя сялянскія рэчы.

Другую частку музея займаюць прадметы апрацоўкі ільну, калаўроты з прасніцамі, а таксама асобныя дэталі ткацтва і прадзення: бёрды, матавілы, верацёны і іншыя прылады.

Ёсць у нашым музеі “цуды” – гэта асабліва каштоўныя экспанаты, якія маюць цікавую гісторыю.Адным з такіх “цудаў” з’яўляецца нацыянальны дзявочы касцюм. Яго падаравала прапрабабуля нашай вучаніцы Вікторыі Кашпар, якая працавала пакаёўкай у Нясвіжскім замку.

Іншыя “цуды”: прыстасаванне для вырабу каўбас, куфэрак шаўца абутку, драўляная ступа-стаяк з таўкачом, патэфон з пласцінкамі.

Тэматыка экскурсій:

1.Ткацтва: посцілкі, ручнікі, дываны, абрусы

2. Ганчарныя промыслы: гладышы, посуд для смятаны, гаршкі

3. Вырабы з дрэва: ступы, маслабойкі, даёнка, карыта, дзяжа

4. Прылады сялянскай працы: сярпы, каромыслы, граблі, пілы, тапары і інш.

5. Беларускае нацыянальнае аддзенне: кашулі, спадніцы, фартухі, капелюшы, андарак, паясы,

6. Старажытная вышыўка: рушнікі, падушкі, дорожкі, сурветкі, абрусы, фіранкі